Story: Nikilitha Burns
KOMANI – Luyaqhuba uqhankqalazo phambi kwee-ofisi zikaMasipala Wesithili saseChris Hani eKomani, nalapho abahlali bevakalisa ukungoneliseki kwabo ngenxa yoko bakubiza ngokungahoywa kwezikhalazo zabo.
Abaqhankqalazi bathi kudala kubanjwa iintlanganiso ezijolise ekusombululeni ingxaki yokunqongophala kwamanzi kwiindawo ezahlukeneyo zesithili saseChris Hani, kodwa ukuza kuthi ga ngoku akukho nkqubela ibonakalayo. Bakwakhankanye iingxaki zokungabhatalwa koonogada kwakunye nezityholo zokukhethwa kwabantu xa kuqeshwa emisebenzini, nto leyo abayibiza ngokuba bubuhlobo nezizalwane ekuqeshweni.
Kungoku nje uSomlomo woMasipala weSithili saseChris Hani, uCllr Jongumzi Cengani, uphume waya kuthetha nabaqhankqalazi nalapho amkele ngokusesikweni iphepha lezikhalazo abalingenisileyo.
