Story: Khaya Gwentshe / Photo: Supplied
CACADU – Utshutshiso lugqibile ngokukhokhela ubungqina, emva kokuba inkundla ive ubungqina buka-Eugene de Kock kwityala lokubulawa kuka Bathandwa Ndondo, owayesakuba ngucommander weVlakplaas ngexesha lorhulumente wengcinezelo, kwakunye negosa elaliphanda eli tyala, uKapteni Madlakane.
UMadlakane uxelele inkundla ukuba ngexesha lophando lwakhe wafumana amaxwebhu kwikomishoni yeNyaniso noXolelwaniso, abonisa ukuba umtyholwa, uGcinisiko Dandala, akazange anikwe uxolelo (amnesty).
Uthe oku kube yenye yezinto ezikhokelele ekubeni uDandala abekwe ityala, emva kophando olude nolunzima, kuquka nobunzima bokufumana amangqina kwiminyaka engaphezu kwama-40 emva kwesehlo.
Isithethi sosapho, uNjingalwazi Lungisile Ntsebeza, sithi eyona nto usapho olusafuna ukuyazi kukuba ngubani owayalela ukubulawa kukaNdondo, kwanokuba kwenzeka ntoni ngaphakathi kwikhombi emva kokuba uNdondo ethathwe ekhayeni lakhe, nto leyo eyakhokelela ekubeni adutyulwe.
Eli tyala kulindeleke ukuba libuyele enkundleni ngoMvulo, umhla wama-21 kuSeptemba.
