Story: Asive Matwa
IDUTYWA – Sele kubanjwe umntu omnye kuqhankqalazo lwabahlali bakwi Lokishi i-Zone 14, noluthe lwangenelelwa ngabahlali base Agriculture kwakunye neGPO eDutywa. Abahlali bebevale uhola wendlela N2 kwakunye neevenkile, bekhalazela ukusilela kwenkonzo zoluntu. Batyhola ngelithi sele kudlule iminyaka eliqela bekhalazela izinto eziquka ukungabinamanzi, izindlu, umbane kwakunye nendlela.
Omnye wabahlali balommandla uthi imeko yabo ayisanyamezeleki kwaphela ingakumbi ngelixesha lemozulu etshintsha tshintshayo ngoba amatyotyombe abahlala kuwo akekho kumngangatho onguwo kwaphela, uthi imvula ibangenela ezindlini.
Ukanti usodolophu kuMasipala wase Mbhashe uDr Samkelo Janda uthi izikhalazo zabahlali azikho kwinqanaba labo, uthi lemeko injongene nesebe lokuhlaliswa koluntu, kodwa njengomasipala uthi baqhagamshelene nesebe ukuqonda amalungiselelo okusombulula lemeko.
