Story: Nikilitha Burns
KOMANI – Iqhutywe ngempumelelo inkqubo yeentsuku ezimbini yoSuku loLutsha ebiququzelelwe ngumbutho i-TakeBackKomani ngokubambisana neSwift Transportation kunye neKelston Cherry eKomani.
Le nkqubo ibijolise ekuxhobiseni ulutsha nasekulweni ukusetyenziswa gwenxa kweziyobisi notywala ngokusebenzisa imisebenzi yobugcisa, inkcubeko, ezemidlalo nolonwabo.
Kutshanje, ulutsha kunye namanye amalungu oluntu athe azimasa intetho ekhethekileyo ebibanjelwe kwiChris Hani District Council Chambers phantsi komxholo othi, “Yazi Imbali Yakho, Thatha Indawo Yakho.” Amaqela ahlukeneyo aquka urhulumente, imibutho yolutsha, amashishini nemibutho yoluntu athe athetha ngemiba yobunkokeli, ushishino nophuhliso loluntu.
Imisebenzi iqhubekile ngoMgqibelo eKomani Community Art Centre nalapho kuthe kwabanjwa ezemidlalo kwakunye nemisebenzi yokupeyinta, nto leyo enike ulutsha ithuba lokubonakalisa izakhono zalo kwiindawo ezahlukeneyo.
Umseki we-TakeBackKomani, uLizalise Onwaba Swaartbooi, uthe le nkqubo ibijolise ekuthinteleni ulutsha ekusetyenzisweni kweziyobisi notywala ngokulunika amathuba okuzibandakanya kwimisebenzi eyakhayo nephuhlisa izakhono. Uthe bayavuya ngenkxaso abayifumeneyo nangenani lolutsha oluthe lwathatha inxaxheba kule nkqubo.
USwartbooi wongeze ngelithi eli phulo liyinxalenye yemizamo eqhubekayo yokuvuselela iKomani Arts Centre nokudala amathuba aza kunceda ulutsha lwaseKomani ukuba lwakhe ikamva elingcono nelinempumelelo.
